CyberSec@GAL, primeiro foro galego sobre seguridade na empresa dixital
admin
- 2019-10-02
2 min
Coñecemento e experiencia unidos para converter a Galicia en
referente no campo da Ciberseguridade. Ese é o obxectivo primeiro do
evento CyberSec@GAL,que comeza a súa andaina nuns días, impulsado pola cátedra R en Ciberseguridade e as Universidades da Coruña e Vigo, e coa colaboración da AMTEGA, Gradiant, Emetel, Hijos de Rivera e Abanca.
Serán 4 xornadas de obradoiros, ciber-retos e relatorios, nas que se
falará de solucións, normativas, desafíos e ameazas para a seguridade na
contorna dixital.
Programa
As tres primeiras xornadas, do 14 ao 16 de outubro, dirixiranse a estudantes e novos licenciados
que van participar en obradoiros sobre introdución á auditoría dos
dispositivos IoT/IIoT mediante Shodan e a analizar vulnerabilidades en
contornas Windows e Linux. Haberá, ademais, un relatorio e exporase o
reto de Ciberseguridade de Gradiant e Hijos de Rivera.
A xornada final, o 17 de outubro, orientada ao ecosistema empresarial,
desenvolverase da man de expertos nacionais e internacionais que
expoñerán, dende perspectivas diversas, aspectos tamén diferentes e
actuais no terreo da Ciberseguridadr. Así, por exemplo, a intervención
do director do Departamento Nacional de Seguridade, o xeneral M. Ángel
Ballesteros, sobre Estratexia Nacional de Seguridade; acerca de
Ciberseguridade na transformación dixital versarán os relatorios de
voceiros de empresas e entidades como Balidea, Gradiant, Inditex ou
Grupo Euskaltel. Tamén se falará sobre a visión actual do mercado ante o
tema da seguridade na empresa e de oportunidades de investimento en
Ciberseguridade da Unión Europea.
Durante a xornada de peche entregaranse, así mesmo, os Premios ao Reto, Traballo Fin de Grao, Traballo Fin de Máster e Doutoramento.
Podes consultar aquí o programa completo e seguir este evento #CyberSecGal2019.
Como asistir
Para os obradoiros, relatorios e reto na web podes inscribirte en CyberSec@GAL. Para a xornada de peche cómpre que o fagas mandando un correo electrónico a catedraRciberseguridade@mundo-r.net, co teu nome, apelidos e empresa á que pertences.
Sobre a cátedra R en Ciberseguridade
A cátedra R en Ciberseguridade,
desenvolvida en colaboración coas universidades de Vigo (UVIGO) e da
Coruña (UDC) e financiada pola Fundación Euskaltel Konekta, é a primeira
cátedra interuniversitaria en Galicia. Persegue basicamente promover o
desenvolvemento de competencias profesionais do alumnado universitario e
mellorar a capacitación dos membros da comunidade universitaria. A idea
é adaptar todo ese potencial de coñecemento e preparación ás
necesidades da empresa fomentando, en paralelo, a formación continua, a
innovación e a investigación na área da Ciberseguridade.
visualizacións: 189
MENÚ
2 min 
